اسرائیلی میڈیا کا دعویٰ: ایرانی پاسدارانِ انقلاب کے نیوی کمانڈر ہلاک

تل ابیب/تہران (بین الاقوامی ڈیسک):اسرائیلی مقامی میڈیا نے دعویٰ کیا ہے کہ اسرائیلی فوج نے ایران کے اسلامی انقلابی گارڈ (IRGC) کے بحریہ کے کمانڈر کو ایک کارروائی میں ہلاک کر دیا ہے۔رپورٹس کے مطابق مبینہ طور پر علی رضا تنگسیری کو نشانہ بنایا گیا، تاہم اس حوالے سے ایرانی حکام کی جانب سے تاحال کوئی باضابطہ تصدیق سامنے نہیں آئی ہے۔یہ پیش رفت ایسے وقت میں سامنے آئی ہے جب ایران اور اسرائیل کے درمیان کشیدگی اپنے عروج پر ہے اور دونوں ممالک کے درمیان مسلسل فوجی کارروائیاں جاری ہیں۔ماہرین کے مطابق اگر اس خبر کی تصدیق ہو جاتی ہے تو یہ ایران کے لیے ایک بڑا عسکری دھچکا ثابت ہو سکتا ہے، کیونکہ پاسدارانِ انقلاب کی بحریہ خلیج فارس میں اہم اسٹریٹجک کردار ادا کرتی ہے۔دوسری جانب، اس واقعے کے بعد خطے میں کشیدگی مزید بڑھنے کے خدشات ظاہر کیے جا رہے ہیں، جبکہ عالمی سطح پر بھی صورتحال پر گہری نظر رکھی جا رہی ہے۔